Suroboyo (25/11/23): Sopo sing gak kenal kutho Suroboyo, kutho sing kesuwur karan kutho Pahlawan. Sa ben taon, kutho iki dadi peratiane wong sa Nuswantoro. Iki mergo kedadean perang 10 Nopember 1945, sing nggarai horeg’e ndunyo, gak liyo mergo jendrale sing karan AWS Mallaby mati. Mallaby mati nang njero montor’e sing gak adoh teko Kalimas tanggal 30 Oktober 1945 mergo ditembak arek arek Suroboyo. Mergo kepaten-e Mallaby ini, Suroboyo digempur entek entek-an karo serdadu Sekutu.
Suroboyo sempat diultimatum sa durunge tanggal 10 Nopember 1945. Tapi arek arek Suroboyo ambek poro pejuang liyane gak keder, gak wedi. Opo maneh arek arek iki entuk semangat teko Gubernur Soerjo lumantar pidato keramat liwat radio. Cekak ringkes-e pidato radio iku ngejak poro pejuang wani maju nglawan serdadu Sekutu. Semboyane, luwih becik mati, timbangane urip nok cengkereman-e penjajah.
Ultimatum-e Sekutu gak sembarangan. Ultimatum-e Sekutu gak mek weden wedenan. Tibak-e temen. Sekutu ngempur Suroboyo liwat serangan laut, darat ambek teko langit. Masiyo ngono arek arek gak keder. Ultimatum-e Sekutu gak direken. Arek arek gak gelem pasrah bongkok-an, gak gelem tekuk lutut, luwih becik mati timbangane dijajah maneh
Akhire arek arek akeh sing mati mergo peluru peluru bedil sampek mitraliur-e Sekutu. Sekutu terus ndesek molai tekok Suroboyo sisih lor sampek ngidul. Arek arek sing sempat mundur, mundure ngulon nang Sepanjang, Krian sampek Mojokerto. Liyane mundur ngidul liwat Sidoarjo, Bangil sampek Malang. Tapi pejuang Suroboyo iki gak kalah. (nanang).